Veiðan heldur fram

Kongafiskaveiðan í altjóða sjógvi í landnyrðingspartinum av Atlantshavinum heldur fram í 2017, hóast Ísland vildi hava veiðibann á Rygginum í 2017 og 2018. Tað sama vil ICES.

Ársfundurin hjá NEAFC var í London í síðstu viku. Kongafiskakvotan í 2017 er 7.500 tons.

Men tað leggur Russland lítið í. Russland hevur ásett sína egnu kvotu, hon er 25.000 tons. Russland viðurkennir ikki stovnsmetingina hjá ICES.

Vilja avmarka fiskiskapin

ES og Danmark mæla til avmarkaðan fiskiskap, tí Russland eigur ikki einsamalt at fiska kongafiskin í altjóða sjógvi á Rygginum millum Føroyar og Íslandi.

Á fundinum í London varð Janet Nørregaard, fulltrúi á Fiskivinnustovuni í Fiskimálaráðnum, vald til varaforseta í NEAFC.

Danmark er limur í NEAFC fyri Føroyar og Grønland. Hini londini eru Ísland, ES, Noreg og Russland.