Teldlanýtslan í fólkaskúlanum greinast

Kanningin varð gjørd í sambandi við, at Tórshavnar kommuna skuldi lata einum skúla teldlar, tí hann skuldi leggjast saman við øðrum skúla, har næmingarnir høvdu teldlar.

Granskarar á Námsvísindadeildini hava gjørt eina eftirmeting av, hvussu og í hvønn mun teldlarnir vórðu brúktir, og hvørja ávirkan tað hevði á læring næminganna, skrivar Fróðskaparsetrið.

Niðurstøðan kemur hálvan desember

Mentanarnevnd býráðsins fekk longu 24. oktober eina fyribilsfrágreiðing, men almenningurin má bíða til 15. desember, tá endaliga frágreiðingin verður løgd fram alment á Námsvísindadeildini á Frælsinum í Havn.

Kanningin byggir á eina OECD-frágreiðing frá 2015 um teldunýtslu og stóra spurnakanning, sum granskarar á Námsvísindadeildini gjørdu.

Kanningin varð gjørd í samstarvi við Háskóla Islands í 2012/13 millum allar næmingar í Føroyum av starvshættum og hugburði til ymsu lærugreinarnar í fólkaskúlanum.