Útflutningurin minkaður nógv

Meðan fyrst og fremst alilaksur og eisini uppsjóvarfiskur viga mest í føroyska útflutningunum nú, er botnfiskurin, sum eina ferð var álitið, minkaður nógv.

Sambært tølum um útflutningin til 1. oktober, útfluttu Føroyar botnfisk sum tosk, hýsu og upsa, fyri 836 milliónir krónur, sum eru ein fjórðingur minni enn í fjør. 

SÍ EISINI Minni botnfiskur verður landaður

Tonsini eru meira enn 7.000 færri í ár, 19 prosent færri enn í fjør. Minni toskur og upsi eru útflutt í ár.  Hagstovan ger tó vart við, at okkurt kann vera flutt í bólkin, sum eitur annar fiskur.

1. januar í ár kom nýggj vøruskrá í gildi. Nøkur fiskasløg, sum fyrr vóru skrásett undir egnum navni, verða nú skrásett sum onnur fiskasløg.

Hetta ger, at samanbering millum bólkar má gerast við fyrivarni tvørtur um ársmarkið 2015/16, sigur Hagstovan.