Steðga samstarvi um bonusskipan

Frá 26. mars næsta ár fáast ikki longur stig í EuroBonus skipanini, tá flogið verður við Atlantic Airways. Og ferðaseðlar kunnu ikki keypast frá føroyska flogfelagnum við EuroBonus-stigum.

SAS hevur sagt upp EuroBonus-samstarvið við Atlantic Airways, boðar Atlantic Airways frá í tíðindaskrivi. Samstarvið byrjaði í 2000.

SÍ EISINI SAS byrjar føroyaflúgving

Samstarvið steðgar 26. mars, sama dagin sum SAS fer at flúgva til Føroya. Tí er seinasti dagur, sum til ber at brúka EuroBonus-stig við Atlantic Airways, tann 25. mars næsta ár.

Atlantic Airways ætlar at stovna sína egnu skipan aftur. Í februar í fjør kunngjørdi Atlantis Airways annars, at felagið styrkti samstarvið við EuroBonus og samstundis varð Súluskipanin hjá Atlantic Airways strikað.