Mæla til at broyta loðslógina

Tað eru tey føroysku handilsskipini, ið eru styttri enn 100 metrar. Vinnumálaráðið mælir nú til at broyta loðslógina, so hesi skipini sleppa undan loðsskylduni. 

Teimum nýtist ikki at hava loðs, tá tey sigla inn í havnir í Føroyum og úr teimum aftur, tí skiparin er væl kendur í Føroyum.

Vilja ikki geva undantaksloyvi

Onkur undantøk eru í lógarbroytingini, til dømis lítil handilsskip, sum sigla við vandamiklum farmi.   

Tá loðslógin var til hoyringar í 2012, helt Reiðarafelagið fyri farmaskip, at øll handilsskip undir føroyskum flaggi eiga at sleppa undan loðsskyldu. 

Men tað vildi Vinnumálaráðið ikki tá, tí nógv handilsskip eru í FAS, altjóða skipaskránni. Hetta eru skip, sum ongantíð ella heilt sjáldan koma í føroyska havn.

Kommunurnar missa inntøkur

Vinnumálaráðið sigur nú, at tá lógin varð gjørd í 2012, varð ikki ansað eftir, at nøkur handilsskip fara inn í nógvar havnir í Føroyum, upp í 36 havnir. 

Loðsskipanin er fíggjarliga og umsitingarliga tyngri hjá hesum handilsskipum og umsitingarliga tyngri fyri stovnin, sum gevur loðsfrítøku, enn væntað og ætlað, tá lógin kom. 

Okkurt reiðarí hevur upplýst, at skiparar hjá teimum skulu hava upp í 20 loðsfrítøkuloyvi. Uppskotið um lógarbroytingina ger, at kommunur fara at missa inntøkur, tí loðsgjøldini verða færri.