Partakvinna minnir á Sjósavnið á Argjum

Áðrenn løgtingið um slakar tvær vikur fer at viðgera uppskotið hjá Elsebeth Mercedis Gunnleygsdóttur um at byggja akvarium í Klaksvík, hevur partakvinna hennara í býráðnum í Havn mint á Sjósavnið í Havn. 

Annika Olsen, borgarstjóri, sigur, at Føroya sjósavn hevur kunnað Tórshavn kommunu um framtíðarætlanirnar hjá savninum.

Annika Olsen er avgjørd, tá hon skrivar, at vit, tað er meirlutin í býráðnum, fara sjálvandi at stuðla um- og útbyggingarætlanini hjá Sjósavninum, ein ætlan, sum sambært borgarstjóranum er spennandi. 

Meirilutin í býráðnum fer at stuðla av fullum huga, sama, hvørjar ætlanir onnur hava um sjósavn ella akvarium, sigur Annika Olsen.  

Tórshavnar kommuna letur Sjósavninum 600.000 kr. í stuðli um árið. Landið letur 284.000 kr. 

Sjósavnið er sjálvsognarstovnur. 

Løgtingið fer 7.februar at viðgera uppskotið til samtyktar hjá Elsebeth Mercedis Gunnleygsdóttur.