Altjóða svimjikapping í Vági

NMU er stór norðurlendsk svimjistevna, har tað umframt svimjarar úr øllum Norðurlondum, eisini eru svimjarar úr baltisku londunum.

NMU verður altíð svomin í 50 metrar hyli, og í ár verður hon í Páls Høll í Vági. 

Stórur áhugi

Rókur í Jákupsstovu, formaður í Svimjisambandinum, sigur, at áhugin fyri kappingini er stórur.

-Vit vænta, at tað koma millum 150 og 200 svimjarar, venjarar, leiðarar og onnur til Føroyar at kappast, sigur Rókur í Jákupsstovu.

Fyrsta av fleiri altjóða kappingum í Vági

Í Vági eru tey longu byrjað at fyrireika norðurlandameistarakappingina, og eftir ætlan verður hetta bara fyrsta av fleiri altjóða kappingum.

- Hetta verður fyrsta stóra altjóða svimjistevnan í Páls Høll, men hetta verður ikki tann seinasta altjóða svimjistevnan í Vági, tað er longu greitt, sigur Dennis Holm, borgarstjóri.

NMU verður  8. og 9.juli. Norðurlendska Meistaraskapurin fyri Ung er fyri árgangirnar gentur 13-15 ár (2002-2004) og dreingir 14-16 ár (2001-2003).