Gera nýggjan býling á Strondum

Síðsta hondin verður í løtuni lagt á eitt íbúðarøki á Strondum, har til samans 24 íbúðir til arbeiðsfólk í Eysturoyartunlinum skulu byggjast.

Fólk og maskinur hava í eina tíð gjørt økið klárt til arbeiði byrjar í tunlinum, og nógv arbeiðsfólk koma at hava sína gongd í økinum.

Økið, har arbeiðsfólkið skal sova og eta, hevur fingið sína egnu innkoyring, og fundamentini til tær 24 íbúðirnar eru klár, skrivar Sjóvar kommuna á heimasíðuni.

Latast aftur í sama standi

Tá ið tunnilsverkætlanin er liðug, og arbeiðið verður riggað av aftur, skal økið latast aftur soleiðis sum Sjóvar kommuna vil hava tað, sigur kommunan.

Nógva arbeiðið í samband við Eysturoyartunnilin fer at elva til eftirspurning og arbeiði hjá vinnulívinum í økinum, heldur Sjóvar kommuna.

Nógvar maskinur, ið skulu brúkast til arbeiðið í Eysturoyartunlinum, koma um vikuskiftið á Skálafjørðin við Eystnesi hjá Smyril Line.