Metár hjá Bakkafrosti

Á ársaðalfundinum hjá Bakkafrosti, sum verður 7. apríl, fer nevndin at skjóta upp, at 8,70 krónur verða goldin í vinningsbýti fyri hvørt partabræv.

Hetta gevur 425 milliónir krónur í vinningsbýti. Nettoskuldin hjá Bakkafrosti var 635 milliónir krónur við ársenda 2016. Hon var 392 milliónir krónur við ársenda 2015.

Bakkafrost hevði 655 milliónir krónur í ótroyttum kredittum við árslok 2016. Solvensurin hjá Bakkafrosti var tá 66 prosent.

Prísurin góður í 2016

Laksaprísurin var metgóður í 2016, tí eftirspurningurin var so stórur, og útboðið minkaði. Millum annað gjørdu algur í Kili, at 25 millónir laksar doyðu har.

Hetta svaraði til, at 100.000 tons av laksi ikki komu á marknaðin. Bakkafrost væntar at taka 55.500 tons av laksi í ár.

Bakkafrost hevur sett sær fyri, at 40-50 prosent av alda laksinum verða seld sum liðug vøra fyri fastan prís. 

Bakkafrost hevur gjørt avtalu um at selja lidnar vørur úr 36 prosentum av laksinum, sum verður kruvdur í ár. Bakkafrost hevur nú 820 fólk í fullum starvi.