Peningur setast av til bátaverkstað

Bjørn Kalsø í Sambandsflokkinum hevur skotið upp játta hálva aðru millión krónur til bátaverkstað, sum skal staðsetast á Spinnarínum í Klaksvík.

Játtanin skal brúkast til at laga hølið til, og at útvega amboð og útgerð verkstaðin, sum skal smíða føroyskar bátar.

Mælt verður til at seta bátasmið í fast starv á tekniska skúlanum í Klaksvík, og harumframt skal í minsta lagi ein lærlingur verða knýttur at verkstaðnum. 

Handverkið í vanda

Bjørn Kalsø sigur, at bátasmiðirnir fækka, og lærlingar verða ikki settir við. Nýggir bátar verða sjáldan smíðaðir, og tí er handverkið í vanda fyri at hvørva, verður einki gjørt.

Hann vísir eisini, at bátasmíð er partur av óítøkiliga siðaarvinum sambært ST-sáttmálanum hjá UNESCO um at verja mentanararvin.

Íløgukostnaðurin verður í fyrsta umfari hálv onnur millión kr. og síðani 700.000-800.000 krónur um árið at løna lærara og lærlingum, umframt tilfar og ferðing, stendur í viðmerkingunum til uppskotið.