Botnfrádrátturin hækkar ikki

Botnfrádrátturin hjá kommununum verður ikki hækkaður í hesum umfarinum. Samgongan tekur ikki undir við uppskotinum hjá Fólkaflokkinum um at loyva kommununum at hækka botnfrádráttin í kommunuskattinum upp í 65.000 krónur eins og hann er í landsskattinum. 

Meirilutin í Fíggjarnevndini sigur tó, at uppskotið eigur at verða viðgjørt í størri høpi. Eitt nú eigur Kommunufelagið at sleppa at viðgera uppskotið væl og virðiliga.

SÍ EISINI Vilja hækka botnfrádráttin

Meirilutin vísir eisini á, at heimildin hjá kommununum at hækka botnfrádráttin kann gera støðuna hjá smáum kommunum verri í kappingini um at draga fólk til sín. Sambandsflokkurin og Miðflokkurin taka undir við Fólkaflokkinum.

Flokkarnir siga í álitinum hjá Fíggjarnevndini, at kommunurnar hava avmarkaðar møguleikar at lætta um skattabyrðuna hjá fólki. Tí eiga kommunurnar at sleppa at hækka botnfrádráttin.