Løgtingsnevnd tekur undir við lógarbroyting

Mentanarnevndin hjá Løgtinginum kom í gjár við áliti um at broyta grein 14, annað stykki, í hjúnabandslógini, so kirkjan sjálv avger, um hon vil signa borgaraliga vígd samkynd.

Meirilutin í nevndini, umboðini hjá samgonguni, tekur undir við broytingini. Tey siga, at kirkjan framhaldandi sjálv kann avgera, hvørji borgarliga gift, hon vil signa. 

Sjálvræðið hjá fólkakirkjuni virt

Lógarbroytingin gevur hvørki boð ella forboð, men virðir kirkjunnar sjálvræði at skipa egnu innaru viðurskifti síni, sigur meirilutin í Mentanarnevndini. 

Sambært uppskotinum hjá Mentamálaráðnum kann kirkjan signa tey, sum hon hevur ritual til at signa. Fólkakirkjan hevur einki ritual til at signa borgaraliga vígd samkynd.

Bjørn Kalsø í Sambandsflokkinum mælir frá at samtykkja uppskotið, og Jógvan á Lakjuni í Fólkaflokkinum mælir staðiliga frá at samtykkja tað.