Tillagingar helst gerast

Tað er neyvan nóg mikið at hækka útreiðslurnar til rakstur næsta ár hálvtannað prosent umframt tað, sum fer til lønarvøkstur, tá hugsað verður um allar framskrivingarnar og raðfestingarnar, sum samgongan hevur sett sær fyri at fremja. 

Tí mugu vit vænta, at landsstýrisfólkini gera tillagingar á sínum øki fyri at rationalisera raksturin. Og landsstýriskvinnan í fíggjarmálum eigur at tryggja, at uppskotið um fíggjarlóg fyri 2018 er innan fyri ásettu karmarnar.

Tað er neyðugt, hóast vøksturin í rakstrarútreiðslunum er nógv minni enn vøksturin í inntøkunum hjá landinum. Umboðini hjá samgonguni í Fíggjarnevndini minna landsstýrið á at halda sínar egnu játtanarkarmar.

Fíggjarnevndin hevur skrivað álit um játtanarkarmarnar fyri fyrst og fremst 2018. Onnur viðgerð verður í tinginum í dag.