Hundraðtals fleiri størv í vinnuni

Tað gongur væl í byggivinnuni í Føroyum. So mikið væl, at tað í mars í ár vóru 656 fleiri størv í byggivinnuni enn fyri trimum árum síðani, í mars mánað í 2014.

3.740 størv vóru í føroysku byggivinnuni í mars mánað í ár samanborið við 3.084 størv í mars 2014. Tað vísa nýggjastu tølini hjá Hagstovu Føroya á hagstova.fo

Í mars í ár vóru til samans 25.851 løntakarar í Føroyum, tað eru 603 fleiri løntakarar enn í mars 2016, vísa tølini. Byggivinnan stóð fyri umleið helvtini av vøkstrinum hetta tíðarskeiðið.

Hinvegin gekst afturá síðsta árið hjá fiski-, ali- og ráevnisvinnuni. Í mars í ár vóru 4.005 størv í vinnuni, í mars 2016 vóru til samans 4.113 størv, vísa nýggjastu hagtølini.