Salt á Facebook: Ólavur Rasmussen settur í starv

Nevndin fyri Salt grunnin hevur í dag sett Ólav Rasmussen í starv sum stjóra í Salt.

Tað verður kunngjørt á facebook-bólkinum, Salt Sound & Live Theatre seinnapartin.

Har stendur eisini, at starvið verður sett frá 1. oktober ella eftir aðrari avtalu við partarnar.

Noyddust at søkja umaftur

Hetta er ikki fyrstu ferð, at Salt grunnurin setir Ólav Rasmussen í starv.

Í fjør vár bað Fíggjarmálaráðið nevndina um at lýsta stjórastarvið av nýggjum, tí Ólavur Rasmussen, sum eisini er formaður í grunninum, var tann einasti umsøkjarin, og sum eftir ætlan skuldi lønast við 50.000 krónum um mánaðin.

Nevndin tók áheitanina til eftirtektar.

Formaðurin fekk løn

Í apríl í fjør bað næstformaðurin í grunninum, Kristian Holbæk Kristensen, Fíggjarmálaráðið um loyvi at lata Ólavi Rasmussen, formanni, fáa 35.000 krónur um mánaðin í løn, umframt pensjón, tí formaðurin hevði nógvar leiðsluuppgávur at taka sær av, til nýggjur stjóri er settur.

Fíggjarmálaráðið svaraði, at ráðið helt samsýningina til formannin vera rímiliga.

Fyrr í summar varð søkt eftir stjóra til mentanarhúsið, Salt, á Drelnesi í Suðuroy. Freistin at søkja var úti 17. august. Tann dagin segði Bárður Larsen, løgfrøðingur, við in.fo, at fimm umsóknir vóru til starvið. Nevndin fyri Salt er setanarnevnd til stjórastarvið, men hon valdi at knýta Bárð Larsen afturat sær sum fakligan ráðgeva.