Velja nýggjan formann í morgin

Tað verður nýggi formaðurin ella nýggja forkvinnan, sum fer at sita við borðendan, tá landsstýrismálanevndin aftur fer at viðgera kærurnar, sum nevndin hevur fingið.

Jógvan Skorheim í Sjálvstýri hevur boðað frá, at hann leggur frá sær sum formaður í landsstýrismálanevndini, tí eftir hansara tykki hevur nevndin ov fáar heimildir.

Landsstýrismálanevndin hevur fund í morgin klokkan níggju, og fyrsta punkt á skránni er formansval.

Hini bæði í nevndini eru Annita á Fríðriksmørk í Tjóðveldi og Magnus Rasmussen í Sambandsflokkinum. Annað teirra verður forkvinnna ella formaður.

Tá formansvalið er avgreitt, fer nevndin at viðgera tríggjar kærur um Høgna Hoydal, landsstýrismann.

Meginfelag Útróðrarmann hevur kært um fiskidagarnar í fjør, Jørgen Niclasen hevur kært um fiskirættindi, og Bjørn Kalsø hevur kært landsstýrismannin í fiskivinnumálum um uppskotið um at fyrisita sjófeingi.