Eitt til trý sjálvmorð í Føroyum árið

Færri føroyingar doyggja fyri egnari hond enn aðrir norðurlendingar.

Grønlendingar eru teir, sum oftast taka seg av døgum, men tilburðirnir eru umleið teir somu í Finnlandi, Íslandi og Svøríki.

Heldur færri sjálvmorðstilburðir eru í Álandi, Noregi og Danmark.

Í øllum norðurlondum eru tað flestir menn, sum doyggja fyri egnari hond.

Tað sigur Sirið Stenberg, landsstýriskvinna, í svari til Kristionnu Winther Poulsen í Javnaðarflokkinum, sum hevur spurt um málið.

Eitt og trý sjálvmorð

Seinnu árini hava verið millum eitt og trý sjálvmorð í Føroyum, men í 2010 vóru seks sjálvmorðstilburðir.

Tá fólk verða løgd inn á Landssjúkrahúsið í sambandi við sjálvmorðsroynd, er vanliga mannagongdin, at tey fáa boðið samrøðu við psykiatara.

Ein annar møguleiki er at fáa boðið uppfylgjandi samrøður, ella at verða lagdur inn á Psykiatriska depilin, verður tað mett skilabest.

Granskingarverkætlan

Í løtuni arbeiðir Landssjúkrahúsið við eini granskingarverkætlan á intensivu deild, sum hevur til endamáls at finna øll tey, sum hava verið innløgd við heilivágseitran, og hvussu nógvir av hesum tilburðum eru sjálvmorðsroyndir.

Nú ber bara til at keypa smáar nøgdir av pínutablettum í hondkeypi á apotekinum. Annars krevst resept.

Í grannalondunum hava verið færri tilburðir av hesum slagi av eitran, og varhugin er, at sama er galdandi í Føroyum, sigur Sirið Stenberg m.a. í svarinum til Kristionnu Winther Poulsen.