Theresa May á fund við Juncker

Bretski forsætisráðharrin, Theresa May, skal í dag á fund í Bruxelles við formannin í ES nevndini, Jean Claude Juncker. Endamálið við fundinum er at fáa veruliga gongd á samráðingarnar ímillum partarnar, nú Bretland ætlar sær úr samveldinum.

Roknað verður við, at May fer at leggja eitt ítøkiligt uppskot fyri formannin í ES nevndini, sum skal umrøðast á toppfundinum í ES, sum verður um 10 dagar.

Uppskotið skal seta út í kortið, hvussu partarnir kunnu samstarva á handilsøkinum í framtíðini.

Líkt er til, at partarnir eru samdir um, hvussu nógv Bretland skal rinda ES, tá landið fer úr samveldinum.

The Telegraph skrivar, at partarnir eru samdir um, at Bretland skal rinda millum 45 og 55 milliardir evrur, svarandi til 337 til 412 milliardir kr.

ES hevði kravt at gjaldið verður avgreitt, áðrenn tingingarnar kunnu halda fram.

Hildið verður, at Bretland vildi sleppa við at rinda 40 milliardir evrur, samstundis sum ES kravdi 60 milliardir evrur. Og tí eru partarnir samdir um nakað meir til Bretland at rinda, men ES fær ikki so nógv sum samveldið kravdi.