Fjølrit vil hava 1,5 milliónir afturvirkandi

Fjølrit hevur sent eina rokning til Mentamálaráðið. 1,5 milliónir krónur fyri kopipengar við afturvirkandi gildi.

Eingin avtala hevur verið millum Fjølrit og føroysku myndugleikarnar seinastu trý árini, meðan tey hava verið í eini tilgongd at yvirtaka lógina um upphavsrætt.

Men nú hevur Mentamálaráðið gjørt eina avtalu við Fjølrit, sum inniber, at Mentamálaráðið rindar 250 krónur fyri hvønn næmingin á Miðnámi og 500 krónur fyri hvønn næmingin á hægri lesnaði.

Fjølrit hevur skotið upp, at kommunurnar gjalda 300 krónur fyri hvønn næming í fólkaskúlanum, og at tann upphæddin er við øllum kopivirksemi í kommununi - eisini frítíðarskúlar og musikskúla, men enn er eingin avtala við kommunurnar.

Í september sendi Fjølrit ein teldupost til mentamálaráðið, har upphæddin 500 túsund krónur um árið - í alt 1,5 milliónir krónur verða nevndar. 

Spurt verður um, hvat Mentamálaráðið heldur um tað, men enn hevur Fjølrit einki svar fingið.

Nú hevur felagið so sent eina rokning uppá 1,5 milliónir krónur. 

Upphæddin fevnir um kopiering av upphavsrættarvardum verkum í tíðarskeiðinum frá 1. januar 2014 til 4. august 2017.

Og tað er fyri virksemið hjá bæði landi og kommunum, sigur Atli K. Petersen, sum er formaður í Fjølriti.