Boð vóru eftir sløkkiliðnum í Skopun í nátt

Ein kona og fýra børn vóru í húsinum, men tey sluppu út.

Eldurin er helst kyknaður í einum mikroovni. Húsfólkini hoyrdu eina spreinging í køkinum. Eldur var í mikroovninum, sum stóð uppi á einum køliskápi.

Vaktleiðarin á politistøðini, Rani Wardum, sigur, at løgreglan fer í dag at kanna orsøkina til eldin - møguliga er talan um skammlop. 

Eldurin hevur bara gjørt skaða har mikroovnurin og køliskápið stóðu, men roykskaði er um alt húsið.