Lógartænastan eftirkannað 222 uppskot

Lógartænastan hjá Løgmansskrivstovuni eftirkannaði 222 uppskot í løgtingsárinum 2016 - tað er frá ólavsøkudegi 2016 til ólavsøkuaftan 2017.

Hetta eru 31 uppskot fleiri enn í løgtingsárinum 2015.

Lógartænastan kannar lógaruppskot og uppskot um kunngerðir hjá teimum átta stjórnarráðnum. Hetta er triðja ársfrágreiðingin, sum lógartænastan gevur út. 

- Endamálið er framvegis at kunna stjórnarráðini um, hvørjar okkara royndir hava verið seinasta løgtingárið, og hvussu hetta eftirkanningarárið eftir okkara tykki hevur hepnast, sigur Nella Festirstein, deildarstjóri á Lógartænastuni.

At eftirkanna lógaruppskot er seinasti liður í tilgongdini at gera lógaruppskot.

Við eftirkanningini verður serliga hugt eftir, um uppskot um lógir og annað lúka formligu krøvini í Tingskipanina og rundskrivinum um eftirkanning.

Í einum lógaruppskoti var til dømis áseting, sum beinleiðis setti til viks áseting í galdandi sáttmála millum partar á arbeiðsmarknaðinum. 

Í eftirkanningini varð víst á, at hetta mátti metast at vera brot á frælsa samráðingarrættin á føroyska arbeiðsmarknaðinum. 

Siðvenjan er, at tá partarnir á arbeiðsmarknaðinum hava gjørt sáttmála, eigur lóggevari ikki at koma við inntrivum, sum órógvar samráðingarúrslitið. 

Landsstýrið kann við slíkari lóggávu koma í vanda fyri at koma undir endurgjaldsskyldu