Djóravælferðarlóg á veg

Gamla djóraverndarlógin verður nú avloyst av eini nýggjari djóravælferðarlóg.

Poul Michelsen, landsstýrismaður, hevur lagt fyri tingið uppskot um djóravælferðarlóg.

Endamálið við lógaruppskotinum, sum er 66 síður til longdar, er sambært viðmerkingunum at fremja djóravælferð, djóravernd og virðing fyri djórum.

Eisini ásetir lógin tær skyldur, sum eru galdandi í viðurskiftunum millum fólk og djór, bæði vill djór og djór, sum eru í varðveitslu hjá fólki.

Uppskotið forðar ikki fyri, at fólk hava og brúka djór, men krøv verða sett til røkt og viðferð.

Ein broyting í nýggju djóravælferðarlógini er ein fráboðanarskylda, ið skal tryggja, at myndugleikar fáa boð, um djór eru fyri vanrøkt. Fráboðanarskyldan tekur við, tá hildið verður at djór verða skammfarin ella eru fyri vanrøkt á annan hátt.

Slík fráboðanarskylda er ikki í galdandi djóraverndarlóg.