Stevna eftir uppsagnarløn

Talan er um lærararnar, sum vóru í Frískúlanum við Hoyvíkstjørn ella Adventistaskúlanum, sum hann eisini varð kallaður.

Lærarafelagið hevur stevnt Frískúlanum eftir uppsagnarlønum - 1,4 milliónir krónur tilsamans.

Frískúlin sigur afturímóti, at lærararnir hava fingið alla sína uppsagnarløn. 

Ósamd um nær, lærarar vórðu uppsagdir

Frískúlin við Hoyvíkstjørn gavst 1. august í 2014. Lærarafelagið og Frískúlin við Hoyvíkstjørn eru ikki samd um, nær lærararnir eru uppsagdir.

Mentamálaráðið er fyribils dømt at góðtaka grundregluna um, at landið eigur eisini at rinda 85 prosent av uppsagnarlønini hjá lærarunum í frískúlunum.

Landið eigur at rinda

Sambært lóg eigur landið at rinda 85% av lønini hjá lærarum í frískúlum og sambært Føroya rætti eisini av uppsagnarlønini.

Frískúlin við Hoyvíkstjørn ella Adventistaskúlin hevur tó stevnt Mentamálaráðnum í sambandi við júst uppsagnarlønina hjá lærarunum í Frískúlanum við Hoyvíkstjørn.

Men hvussu verður við henni, veit skúlin ikki, fyrr enn úrslitið av sakarmálinum við Lærarafelagið er greitt.

Bæði málini eru á rættarlistanum hjá Føroya rætti týsdagin.