400.000 dollarar fyri at hitta Trump

Tað skrivar BBC, sum endurgevur ónevndar keldur í Kiev, ið sambært BBC hava tætt samband við tey, sum eru uppi í hesum málinum.

Millumgongufólk hjá Petro Porosjenko, forseta í Ukraina, skipaðu fyri at flyta peningin, siga keldurnar. 

Hetta varð gjørt, hóast Michael Cohen, persónligur advokatur hjá Donald Trump, ikki var skrásettur sum umboð fyri Ukraina, sum amerikansk lóg annars krevur.

Fundurin millum Trump og Porosjenko var í Hvítu Húsunum í juni í fjør.

Stutt eftir at ukrainski forsetin kom heimaftur til Ukraina, gavst landins antikorruptións-stovnur at kanna Paul Manafort, sum hevði staðið á odda fyri valstríðnum hjá Donald Trump.

BBC skrivar, at einki bendir á, at Donald Trump visti um, at advokatur hansara fekk 400.000 dollarar fyri at skipa fyri fundinum við seg.