Beinleiðis: Føroyar - Slovenia

Føroysku kvinnurnar spældu seg tíðliga í 2017 víðari til HM-undankappingina. Nú verður triðji dysturin hjá kvinnunum á heimavølli spældur, tá Føroyar taka ímóti Slovenia á Tórsvølli klokkan 17.00.

Hetta er aðru ferð liðini møtast. Fyrru ferð taptu kvinnurnar 5-0 til Slovenia, og tá varð spælt í Slovenia. 

Ansy Sevdal, sum eisini spælir við EBS/Skála, heldur, at dysturin móti Slovenia í dag er besti møguleikin hjá kvinnunum at fáa stig í hesi undankappingini. 

- Mótstøðuliðið er sterkt, men vit vita samstundis eisini, at sannlíkindini fyri at fáa stig ella spæla upp ímóti teimum, so vit fáa ein javnan og spennandi dyst, eru størst í júst í hesum dystinum, sigur Ansy Sevdal, sum hevur spælt 30 A-landsdystir fyri Føroyar, við FSF.fo.

Umframt hesi bæði liðini eru Ísland, Kekkia og Týskland eisini í bólkinum. Føroyar hava spælt og tapt ímóti øllum londum. 

Eftir dystin í dag er bara eftir at spæla heimadyst ímóti Týsklandi. Hesin verður spældur 4. september.

Beinleiðis frá Tórsvølli

Kringvarpið vísir dystin í dag beinleiðis í sjónvarpinum og á heimasíðu okkara.

Leinkjuna finnur tú her. Vit byrja at senda klokkan 16.45.