Forboð at selja vælumtóktu ræstkjøtaburgararnar

Eigarin av matstovuni skrivar á Facebook í dag, at tey ikki longur sleppa at selja vælumtóktu matvøruna.

Fyrst seldi hann ræst kjøt, ið var innflutt úr Íslandi og ræsað í Føroyum, men í gjár fekk hann boð um at steðga við hesum.

Laila S. Jacobsen er deildarleiðari á matvørudeildini á Heilsufrøðiligu Starvsstovuni og sambært henni, snýr tað seg um serligar reglur, sum eru galdandi fyri beinleiðis sølu av kjøti.

- Í Føroyum hava vit eitt serligt undantak fyri óløggilt kjøt, og tað er regulerað í einari kunngerð, sum bara letur undantak fyri føroyskar rávørur og ikki íslendskar, sigur hon. 

Síðani keypti matstovueigarin ræst kjøt frá føroyskari heilsølu, men heldur ikki tað slapp matstovan at selja, tí ivamál stungu seg upp um framleiðaran av kjøtinum.

- Heimaframleiðslukunngerðin setur nakrar treytir til at vera heimaframleiðari. Ein av hesum er, at tú hevur latið teg skrásett á einum lista, sum liggur á heimasíðuni hjá Starvstovuni. Tað, sum varð mær upplýst, var, at tað er ikki greitt, at viðkomandi varð skrásettur, sigur Laila S. Jacobsen frá Heilsufrøðiligu Starvsstovuni. 

Tað er Ruben Busk, sum eigur og rekur MATsmiðjuna Streetfood í Saksun. Við Dimma.fo sigur hann, at ræstkjøtaburgararnar góvu umleið 80% av søluinntøkuni. 

- So nú er alt grundarlagið undir fyritøkuni brotið sundur. Eg kann sjálvandi kanna, um eg kann fáa ræst kjøt aðrastaðni frá, men um eg ikki finni nakað, so verði eg nokk noyddur at steðga fyri í ár, sigur hann við Dimma.fo.