Fara skjott aftur í rættin

Sakarmálið millum Fíggjarligt støðufesti og leiðsluna, sum var í Eik banka, tá bankin fór av knóranum í 2010, verður tikið upp aftur í Føroya rætti tann 27. august. 

Tá verða skjølini hjá grannskoðanini hjá Eik banka løgd fram, skjølini hjá grannskoðanarvirkinum Nota og Hans Laksá, grannskoðara. Tann framløgan verður sambært verandi tíðarætlan liðug í desember.

Sambært tíðarætlanini verður farið undir at avhoyra teir fimm saksøktu tann 10. desember. Tey stevndu eru Marner Jacobsen, forstjóri, Bjarni Olsen, stjóri, Frithleif Olsen, nevndarformaður til 2010, Odd Bjellvåg, næstformaður og seinni formaður, Hans Laksá, grannskoðari, og grannskoðarafelagið Nota.

Í øllum førum 140 vitni skulu eisini avhoyrast.

Liðugt í mai

Miðað verður eftir, at stóra sakarmálið er liðugt í Føroya rætti í mai næsta ár. Fíggjarligt støðufesti stevndi í 2016 eftir 150 milliónum krónum.

Teir saksøktu krevja frídøming. Rættarmálið millum Fíggjarligt støðufesti og leiðsluna í gamla Eik banka, sum byrjaði hálvan januar, varð útsett 9. april.

Partarnir vildu fyrst gera seg lidnar við sakarmálið um Eik Bank í Danmark. Tað sakarmálið varð viðgjørt í Eystara landsrætti. Tann viðgerðin var liðug 26. juni. Dómur fellur tann 26. oktober.