Rættargangslógin er afturúrsigld

Rættargangslógin fyri Føroyar er rættiliga afturúrsigld. 

Tað ásannar Aksel V. Johannesen, løgmaður, eftir fund við danska løgmálaráðharran Søren Pape Poulsen, fyrrapartin.

Sambært løgmansskrivstovuni eru fleiri enn 200 lógarbroytingar gjørdar í donsku rættargangslógini, sum ikki eru settar í gildi fyri Føroyar. 

- Tað er óheppið, tá Føroya Rættur er ein samfeldur partur av tí donsku dómstólaskipanini, og fleiri dómar skulu roynast í landsrættinum og Hægstarætti, sigur Aksel V. Johannesen í tíðindaskrivi.

Í fjør varð ein dansk-føroyskur arbeiðsbólkur settur at gera eina uppskot til eina fullkomna dagføring av rættargangslógini fyri Føroyar. Sambært løgmansskrivstovuni verður arbeiðið liðugt fyrst í 2019.