- Tíðindi, mentan og ítróttur
Stuðul til flogfeløg latast
![](https://kvf.fo/sites/default/files/styles/grein-ovasta-mynd/public/floghavnin_vagar_vaga_floghavn.png?itok=YJhgU_GL)
Pengarnir verða millum annað latnir teimum, sum uttanlands skipa fyri átøkum, har beinleiðis ella óbeinleiðis flogleiðir verða settar á stovn, og til at stuðla ferðamálum og flogleiðum, sum sambært Visit Faroe Islands eru lyklamarknaðir.
Hesir marknaðir eru fyrst og fremst Norðurlond, Týskland, Stóra Bretland, Niðurlond, Frakland og USA.
Marknaðarføringin verður løgd til rættis í samsvari við marknaðarætlanina hjá Visit Faroe Islands, sigur Vága floghavn.
Ein trímannanevnd hjá Vága floghavn viðger umsóknirnar, sum skulu vera inni fyri 1.mai í 2019.
Um neyðugt verða umsóknir flýggjaðar Visit Faroe Islands til metingar, sigur Vága floghavn.
Stuðul verður bara latin flogfeløgum, sum virka fyri at betra leiðirnar til Føroya og úr Føroyum, sum vilja styrkja sína støðu á útlendska marknaðinum, og vera við í arbeiðinum at marknaðarføra Føroyar sum ferðavinnumál.
Í mesta lagi 700.000 kr. kunnu latast einstakari fyritøku. Vága floghavn kann tó víkja frá hægsta markinum, um talan er um stórar felags verkætlanir.
Umsóknir um stuðul undir 50.000 kr. verða í høvuðsheitum ikki viðgjørdar, skrivar Vágafloghavn á heimasíðu síni.