Etiska ráðið tekur undir við varskógvaraskipan

Vit eiga eisini at hugsa um tann, sum varskógvað verður um, og ikki bara um tann, sum varskógvar.

Tað sigur Etiska ráðið, sum tekur undir við, at vit fáa eina varskógvaraskipan í Føroyum.

Føroyar eru eitt lítið land, har sum tey flestu onkursvegna kennast. Tí kann sosialt eftirlit gera, at eingin torir at varskogva.

Etiska ráðið sigur, at neyðugt er at gera mannagongdir, sum tryggja, at bæði tann, sum varskógvar, og tann, varskógvað verður um, fáa eina virðiliga viðgerð.

Etiska ráðið spyr, um ikki krøv skulu setast til varskógvanir, so ikki verður varskógvað uttan haldgóða orsøk.

Ein vegleiðing um varskógving hevði verið hóskandi.

Etiska ráðið skjýtur eisini upp at áseta í lógini, nær hon skal eftirmetast. 

Fíggjarmálaráðið, sum hevur gjørt uppskotið um varskógvaraskipan fyri alment sett starvsfólk, sigur, at tíðin má vísa, nær ein eftirmeting er neyðug.

Á tingfundin seinnapartin í dag fer tingið viðgera lógaruppskotið um varskógvaraskipan fyri alment sett starvsfólk.