Íslendski landsrætturin viðgjørt drápsmálið

Revsimálið um drápið í Íslandi í januar í fjør, tá 20 ára gamla Birna Brjánsdóttir varð fyribeind, er tikið upp til dóms í íslendska landsrættinum. Dómur skal sigast í seinasta lagi um fýra vikur.

Thomas Möller Olsen úr Grønlandi fekk 19 ára fongsulsrevsing fyri drápið og fyri at smugla 23 kilo av hashi við trolaranum, sum hann var við.

Landsrætturin brúkti 13 tímar til at viðgera málið í gjár.

Ákæruvaldið krevur, at dómurin verður staðfestur.

Noktar seg sekan í manndrápi

Verjin hjá Thomasi Möller Olsen krevur frídøming ella, at málið verður slept. 

Í øðrum lagi krevur hann, at Thomas Möller Olsen bara verður dømdur fyri at hava átt lut í drápinum, tað er fyri medvirkan. 

Thomas Möller Olsen hevur alla tíð noktað seg sekan í manndrápi. Hann kastar skuldina á ein skipsfelaga, skrivar RÚV.

Skipsfelagin, sum eisini er úr Grønlandi, varð tikin í fjør, men varð latin leysur aftur eftir tvær vikur í varðhaldi. 

Og ein mánað seinni tók íslendska politiið skuldsetingina móti honum aftur. Hann er ikki undir illguna fyri at eiga lut í drápsmálinum.