Vinnunevndin sent nógv fundarboð um Posta

Vinnunevndin fer í dag at viðgera uppskotið hjá Poul Michelsen, landsstýrismanni, um at einskilja Posta.

Nevndin ætlar at hoyra, hvat onnur halda um málið, og hevur sent boð eftir feløgum í flutningsvinnuni. Tey eru EUR express, Smyril Line Cargo, Safari Transport og Faroe Ship.

Boð eru eisini farin til sáttmálapartarnar hjá teimum, sum atbeiða í Posta, Føroya arbeiðsgevarafelag og Starvsmannafelagið.

Kommunufelagið er boðsent og Poul Michelsen, landsstýrismaður, saman við umboðum fyri Posteftirlitið, Kappingareftirlitið og P/f Postverk Føroya.

12 onnur tingmál eru eisini á skránni hjá Vinnunevndini í dag.

Løgtingsfundur verður aftur týsdagin 4.desember.