- Tíðindi, mentan og ítróttur
Sendifólk til Keypmannahavn seint í 2019
- Miðað verður eftir, at nýtt sendifólk til sendistovuna í Keypmannahavn verður tilnevnt seinna hálvár í 2019. Tað sigur Aksel V. Johannesen, løgmaður í svari til Edmund Joensen, tingmann.
Tingmaðurin hevur aftur spurt, um sendimaður skal staðsetast í Keymannahavn.
Hann spurdi eisini fyri hálvumøðrum ári síðani, tí skeiðið hjá sendimanninum var úti í 2016, og tá varð avgjørt ikki at seta nýtt sendifólk, tí sendistovurnar skuldu eftirmetast.
Alla hesa tíðina hevur sendimaðurin í Keypmannahavn búð í Føroyum og arbeitt fyri Uttanríkis- og vinnumálaráðið, og hevur so eftir tørvi ferðast til sendistovuna í Keypmannahavn.
Aksel V. Johannesen, løgmaður svarar, at sendimaðurin varð tikin heim í eina tíð fyri at styrkja um arbeiðið at raðfesta okkara marknaðarviðurskifti við Japan, Suðurkorea og Kina. Og harumframt hevur hann so í samstarvi við starvsfólkini á sendistovuni í Keypmannahavn havt ábyrgdina av at reka sendistovuna har.
Løgmaður sigur, at hetta hevur hóskað væl, tí japanskir, kinesiskir og koreanskir myndugleikar brúka sendistovur sínar í Keypmannahavn sum bindilið við føroysku myndugleikarnar.
Men miðað verður altso eftir, at nýtt sendifólk verður tilnevnt seinna hálvár 2019, sigur løgmaður í svarinum til Edmund Joensen, tingmann.