Atløgubryggja á Glyvrum liðug

Í gjár fekk Runavíkar kommuna vestaru atløgubryggjuna í bátahylinum á Glyvrum frá smápartafelagnum Rókini, sum gjørdi arbeiðið.

Fýra byggifeløg vórðu biðin um at geva tilboð.

Býráðið samtykti at taka av tilboðnum frá Rókini, sum var tað lægsta. Tað var slakar tvær milliónir krónur.

Kongshavnar havnarstýrið hevur fíggjað arbeiðið.

Krevur øll havnargjøld

Havnarstýrið krevur inn øll havnargjøld frá skipum, sum koma inn um havnarmerkini á Skálafjørðinum.

Gjøldini verða síðani býtt millum tær fýra kommunurnar við Skálafjørðin, lutfalsliga eftir fjøruteini. 

Runavíkar kommuna eigur tí 48 prosent av havnargjøldunum.

Pengarnir skulu brúkast til íløgur fram við fjøruni við Skálafjørðin.

Eliesar Kastalag hevur teknað vestaru atløgubryggjuna á Glyvrum.