650 túsund krónur í stuðli til yrkisleiklist

Størsta einstaka upphædd varð latin til bólkin Tvazz við Gunnvá Zachariassen, ið arbeiðir við skaldsøguni Ó - søgur um devulskap eftir Carl Jóhan Jensen. Tey fingu 150 túsund krónur.

Det Færøsche Compagnie við Urd Johannesen, ið arbeiðir við Hamlet hjá William Shakespeare, fekk 100 túsund krónur.

Tilsamans komu 12 umsóknir inn og søkt var tilsamans um 1.7 milliónir krónur. Átta vórðu valdar út og 650.000 túsund krónur latnar, ið eisini er játtanin til yrkisleiklist.

Tað er Leiklistaráðið, sum viðger umsóknirnar og ger tilmæli til landsstýrismannin sambært lógini um Tjóðpall Føroya og stuðul til yrkisleiklist.

Endamálið við játtanini er at menna yrkisleiklistina, og stuðul kann latast feløgum, bólkum og einstaklingum, ið reka yrkisleiklistaligt  virksemi, til leikrit, tónasmíð, leikstjórnan, framførslur, keyp av útbúnaði, verkætlanir, skeið, keyp av sakkønari hjálp og annað leiklistavirksemi.