Íslendsk skip sleppa í føroyskan sjógv

Íslendsk skip kunnu fiska uppsjóvarfisk í føroyskum sjógvi. Íslendska svartkjaftakvotan í ár er 241.000 tons. Nógv tað mesta verður fiskað undir Føroyum, hagar svartkjafturin nú er á veg.

Kunngerðin um íslendskan fiskiskap í føroyskum sjógvi í ár er komin í gildi. Í mesta lagi 15 íslendsk skip kunnu fiska svartkjaft her í senn. 

Umframt svartkjaft sleppa íslendsk skip at fiska sína kvotu av norðhavssild í føroyskum sjógvi og 1.300 tons av makreli. 

Íslendska sildakvotan í ár er góð 102.000 tons. Hjáveiðan hjá íslendsku uppsjóvarskipunum má bara vera tvey prosent, sambært kunngerðini.