Nýggjur sendimaður í Keypmannahavn í Havn fyribils

Jóhannes Vitalis Hansen verður føroyskur sendimaður í Keypmannahavn.

Hann tekur við starvinum 1.oktober. 

Í fyrsta umfari røkir hann starvið úr Føroyum til nýggjárs. 

Um hann flytur til Keypmannahavnar eftir nýggjár veldst um játtanina, sum Uttanríkismálaráðið fær í fíggjarlógini fyri 2020.

Hon má verða størri enn játtanin í ár, sum er tríggjar milliónir og 647.000 kr., um sendimaðurin flytur til Danmarkar.

Var í London

Jóannes V. Hansen hevur verið sendimaður í London. Síðani hann kom heim haðani fyri nøkrum árum síðani, hevur hann arbeitt í Uttanríkismálaráðnum.

Umframt sendimannin eru tvey fólk í føstum starvi í føroysku sendistovuni í Keypmannahavn. 

Sigmundur Ísfeld hevur verið sendimaður í Keypmannahavn síðani 2012. 

Tvey tey seinastu árini hevur hann tó havt starvstað í Føroyum, har hann samstundis hevur staðið fyri arbeiðinum at fáa handilsavtalur við lond í Fjareystri.

Sigmundur Ísfeld er nú fyrsti sendimaður Føroya í Beijing í Kina.