Nýggj fiskivinnulóggáva

Við at endurgeva samgonguskjalið boðaði Jacob Vestergaard í dag tinginum frá, hvat hann ætlar við fiskivinnuni.

Hann segði, at hann ætlar at leggja fyri tingið uppskot um nýggja fiskivinnulóg við teimum broytingum, sum eru í samgonguskjalinum.

Millum annað verður uppsagnartíðin 10 ár, tá loyvi at fiska verður søgd upp.

Loyvini verða latin skipunum.

Útlendingar sleppa at eiga

Útlendskur ognarlutur í fiskivinnuni heldur fram, men lækkar niður í 25 prosent hjá teimum útlendingum, sum í framtíðini seta pengar í føroysku fiskivinnuna á sjógvi. 

Og fiskidagaskipanin heldur fram. 
  
Jacob Vestergaard, landsstýrismaður í fiskivinnumálum, legði fyrrapartin fram frágreiðing um fiskivinnulóggávuna.

Sambært lógini frá 2018 um, hvussu sjófeingið skal umsitast, skal slík frágreiðing leggjast fyri tingið fyri 1.oktober.

Frágreiðingin skal siga, hvussu sjófeingið verður umsitið, hvørji rættindi eru at fiska uttan fyri føroyskan sjógv, og, ikki minst, hvørjar ætlanir, landsstýrismaðurin hevur.