Varastjórin helst settur í næstu viku

Nýggi varastjórin á Landssjúkrahúsinum við læknafakligari bakgrund verður helst settur í næstu viku, ella í seinasta lagi aðru viku. Tað sigur Steinar Eirikstoft, stjóri á Landssjúkrahúsinum.

Fyrrverandi varastjórin, Thomas Schiøler, segði seg úr starvinum í september mánað, tí hann hevur fingið eitt "dreymastarv" í Danmark, sum hann málbar seg tá.

Ikki gravgangur eftir starvinum

Tað er ikki gravgangur eftir at verða varastjóri á Landssjúkrahúsinum við læknafakligari bakgrund. Bara tvey fólk hava søkt starvið í hesum umfarinum.

Tað var heldur ikki gravgangur eftir starvinum í 2018, tá undanfarni varastjórin varð settur. Tá søkti bara eitt fólk starvið, og tað mátti lýsast umaftur, og tá søktu fimm fólk starvið.

Tey bæði fólkini, sum nú hava søkt starvið sum varastjóri við læknafakligari bakgrund, eru bæði tvey føroyingar, sigur stjórin á Landssjúkrahúsinum.