Lønirnar upp um 10 milliardir í 2019

Lønirnar í Føroyum eru nú farnar upp um tíggju milliardir. Fólk í Føroyum fingu nakað yvir tíggju milliardir krónur í løn í fjør.

Tað eru 6,8 prosent meira enn í 2018, upplýsir Hagstovan. Vøksturin í lønunum hevur verið støðugur síðani 2013, tá góðar sjey milliardir krónur vórðu goldnar í lønum.

Munurin millum menn og kvinnur var tann sami sum í 2018. Menn áttu sløk 63 prosent av lønunum og kvinnurnar 37 prosent.

63,7 prosent av lønargjaldingunum í fjør vóru í almennum og privatum tænastuvinnum, 20,1 prosent í fiskivinnu og aðrari tilfeingisvinnu og 16,2 prosent í byggivinnu og aðrari tilvirking.