Semingsmenninir tosa við báðar partar í dag

Semingsstovnurin fer at hava fund við Starvsmannafelagið og lønardeildina í Fíggjarmálaráðnum klokkan eitt.

Í gjár tosaðu semingsmenninir við Starvsmannafelagið og lønardeildina hvør sær.

Terje Sigurðsson, semingsmaður, sigur, at enn er bara talan um innleiðandi samráðingar, og tí ber ikki til at siga nakað ítøkiligt um gongdina.

Hava ikki boðað frá tiltøkum

Semingsmenninir hava rætt til at leingja eitt møguligt verkfall ella verkbann í eina viku, men tað er ikki neyðugt enn, tí hvørgin parturin hevur boðað frá tiltøkum, sigur Terje Sigurðsson.

Fíggjarmálaráðið boðsendi semingstovninum fríggjadagin.

Terje Sigurðsson sigur, at munur er á tí, sum Starvsmannafelagið krevur, og tí sum Fíggjarmálaráðið vil lata.

Í dag fara semingsmenninir at umrøða onkur viðurskifti saman við pørtunum, sigur Terje Sigurðsson.

Hann vil ikki geva eitt boð uppá, nær eitt úrslit kann væntast, og heldur ikki, hvussu leingi semingsstovnurin ætlar at tosa við partarnar.