Eingin galdandi áseting

Kunngerðin frá 2018 um treytirnar, sum eru galdandi í sambandi við, at fiskur skal avreiðast í Føroyum, og minst fjórðingurin bjóðast út á uppboðssølu, er ikki galdandi longur.

Treytirnar vóru ásettar eftir gomlu lógini um sjófeingi. Kunngerðin nevndi 22 fiskasløg, sum skuldu um bryggjukant í Føroyum.  

Har er komin nýggj kunngerð. Men í staðin fyri at nevna fiskasløgini, ið skulu í land í Føroyum, eru sløgini nevnd, sum eru undantikin kravinum um føroyskan bryggjukant.

Landsstýrismaðurin kann áseta reglurnar

Orðingin um føroyskan bryggjukant er tann sama í nýggju lógini sum hon var í gomlu lógini um sjófeingi. Kunngerðin, sum nú er farin úr gildi, segði eisini, at í minsta lagi 25 prosent av øllum fiski skuldu bjóðast út á  uppboðssølu í Føroyum.

Nýggja lógin um sjófeingi sigur um slíka uppboðssølu, at landsstýrismaðurin kann áseta reglur um hana. Í viðmerkingunum um lógina stendur, at 30 prosent av botnfiskinum skulu seljast á uppboðssølu.

Kunngerðin er ikki lýst, men hon er á veg, sigur Jacob Vestergaard, landsstýrismaður. Munur er á at bjóða út og selja. Fiskur, sum verður boðin út, verður ikki altið seldur.