Hevði einki línuloyvi fyrr enn í ár

Eitt av reiðaríunum, sum fekk tillutað makrelkvotu til línuskip eftir kunngerðini um fiskiskap eftir makreli frá 30. desember í fjør, hevði einki línuloyvi fyrr enn í januar í ár.

Tað vísa skjøl, sum Kringvarpið hevur fingið innlit í. 

31. desember í fjør fingu 21 rættindahavarar við fiskiloyvi til línuskip 4.000 tons av makreli at býta javnt millum sín. Hetta vóru makrelkvotur, sum hesir rættindahavarar kundu fáa onkran annan at fiska, tí línuskip vanliga ikki hava útgerð til at fiska makrel. 

Makrelurin varð býttur eftir kunngerð um fiskiskap eftir makreli undir føroyskum flaggi frá 30. desember í fjør, sum staðfestir: at "Fiskiskapurin verður skipaður við egnari árskvotu, har tey 4.000 tonsini verða býtt javnt millum talið av veiðiloyvum í bólkinum 31. desember 2017." 

Einki fiskiloyvi

Men av teimum 21, sum fingu part av markelinum, var tað bara Deep C Fishing við skipinum Borðoyarnes, sum ikki hevði nakað fiskiloyvi til línuskip fyrr enn í januar í ár. 

Felagið keypti í 2018 línuskipið Mascot frá reiðarínum P.f. Eysturoy. Vørn segði, at fiskidagaloyvið fylgdi ikki við keypinum, og tað staðfesti Fiskimálaráðið eisini seinni. 

Men í desember í fjør komu kontraboð úr Fiskimálaráðnum. 

"Fiskimálaráðið var komið til skeiva niðurstøðu fyrstu ferð," stóð millum annað í nýggju niðurstøðuni.

Stovnaði nýtt fiskiloyvi

 Ráðið valdi tí at stovna eitt nýtt fiskiloyvi til Deep C Fishing, so samlaða talið av fiskiloyvum til línuskip nú er 21 í staðin fyri 20. 

Sostatt var loyvið hjá Mascot verandi hjá P.f. Eysturoy, sum stórreiðarin Annfinn Olsen eigur, meðan Borðoyarnes hjá Deep C Fishing fekk eitt nýtt loyvi. 

Meira um hetta málið verður í Breddanum í útvarpinum í dag eftir tíðindini klokkan fimm.