Corona-smittan breiðir seg skjótt

Corona-smittan breiðir seg skjótt, og í gjár var illgruni um, at tveir føroyingar høvdu corona. Fyrstu royndirnar av hesum fólkunum vóru tó negativar. Royndirnar eru eisini sendar til Danmarkar til kanningar, og úrslitið haðani kemur væntandi seinnapartin í dag.

Ein tilburður varð í gjár staðfestur í Íslandi, og higartil eru tríggir tilburðir av smittuni staðfestir í Danmark.

Trý fólk í Danmark staðfest smittuna

Tann triði persónurin í Danmark, sum er smittaður við corona, starvast á universitetssjúkrahúsinum í Aarhus, og umleið 30 fólk, sum hann hevur havt samband við, eru farin í karantenu, skrivar danska kringvarpið.

Í Noregi hevur ein lækni, sum starvast á universitetssjúkrahúsinum í Oslo, fingið staðfest coronasmittu, skrivar NTB.

Maðurin hevur verið í Norðuritalia, har fleiri hundrað fólk eru smittað. Seks fólk eru smittað av coronavirusi í Noregi, og í Svøríki eru seks fólk smittað.