Bústaðarpolitikkur: Frágreiðingin handað í morgin

Frágreiðingin um bústaðarpolitikkin, sum ein arbeiðsbólkur hevur gjørt, verður handað landsstýriskvinnuni í bústaðarmálum, Elsebeth Mercedis Gunnleygsdóttir, í morgin, og tá verður eisini skipað fyri tíðindafundi í Almannamálaráðnum.

Umboð fyri Almannamálaráðið,  Fíggjarmálaráðið, Bústaðir, privatar útleigufyritøkur, áhugafelagið Búgva, Vinnuhúsið, Kommunufelagið og fíggingarstovnarnar hava sitið í arbeiðsbólkinum. Regin Hammer hevur verið formaður í arbeiðsbólkinum. 

Ein afturvendandi spurningur í arbeiðnum hevur verið, hvussu almenna bústaðarfelagið Bústaðir skal javnsetast við privata vinnulívið.

Arbeiðssetningurin víðkaður

Eftir at arbeiðið var byrjað, varð eitt nýtt høvuðspunkt skoytt upp í arbeiðssetningin hjá arbeiðsbólkinum, sum fekk uppgávuna at koma við ítøkiligum uppskotum um, hvussu øll bústaðabygging kann verða javnsett í treytum, tað veri seg
leigu-, luta-, eigarabústaðir og sethús - harvið eisini almenn bygging, privat feløg og føroyskar familjur.

Sambært innanhýsis skjølum í arbeiðsbólkinum er hetta nýggja høvuðspunktið orsøkin til, at arbeiðið ikki bleiv liðugt til tíðina, tað var hálvan januar.

Ein fyribils frágreiðing frá bólkinum, sum kringvarpið fekk fatur í, vísti ítøkiligar ætlanir um, at Bústaðir skulu virka á vinnuligum grundarlagi, fyri at javnseta alment og privat.