Óvist um smittað gerast mótstøðufør

– Enn vita vit ikki fyri vist, um koronasmittað fólk verða mótstøðufør, eftir at tey hava havt virusið, tí hetta er eitt virus, vit bara hava kent í fáar mánaðir. 

Tað sigur Shahin Gaïni, serlækni í infektiónssjúkum, við útvarpið

Spurningurin um andevnini kemur av, at tað í gjár kom fram, at andevnisroyndir eru á marknaðinum, men hesar ávarar Shahin Gaïni um, tí tað enn er ilt at vita, um hesar rigga ella ikki. 

Kunnu fáa vitan um myrkatølini

Shahin Gaïni leggur eisini dent á, at tað tydningarmiklasta framvegis er, at greiða fæst á, um fólk eru smittað ella ikki, og at andevnisroyndir kunnu gerast meiri týðandi frameftir, fyri at greina møgulig myrkatøl.

Tað vil siga, hvussu nógv fólk hava havt smittuna -  ella fyri at kanna millum annað heilsustarvsfólk. 

– Eru tey (fólkini, red.) vorðin mótstøðufør, kunnu tey betri hjálpa koronasjúklingum. Men enn er ov tíðliga at siga, sigur Shahin Gaïni, serlækni í infektiónssjúkum.