WHO ávarar um at lata upp aftur

Um samfeløgini verða latin upp ov tíðliga og ov skjótt, kann tað hava við sær, at koronavirusið av álvara kyknar upp aftur, ljóðar ávaring frá heimsheilsustovninum, WHO, sambært BBC.

Leiðarin, Tedros Adhanom Ghebreyesus, sigur, at lond skulu vera varin, tá tey linka um smittutálmandi tiltøkini. Eisini hóast tey merkja búskaparligu avleiðingarnar av tiltøkunum betur og betur.

Bæði Spania og Italia, sum eru tey bæði harðast raktu londini í Evropa higartil, eru farin at linka um tiltøkini, eftir at gongdin er batnað munandi í seinastuni. 

Fegnast um gongdina

Og WHO fegnast um, at smittútbreiðslan í fleiri evropeiskum londum gongur seinni nú. Stovnurin arbeiðir nú saman við stjórnum við ætlanum um at lata samfeløg uppaftur, segði Ghebreyesus. Men tað skal gerast við skili, ávaraði hann, sambært BBC.

Í Spania ætlar stjórnin at lova fólki í byggi- og framleiðsluvinnuni aftur til arbeiðis í næstum. 

Stjórnin í Italia hevur longt avbyrgingina til 3. mai, men ætlanir eru um, at partar av tænastuvinnuni skulu lata upp aftur eftir páskir. Talan er millum annað um bókhandlar, handlar, sum selja barnaklæðir og vaskarí.

Bert matvøruhandlar og apotek hava havt opið sum vanligt, síðan avbyrgingartiltøkini vórðu sett í verk.