Føroyingar og grønlendingar ikki í sóttarhald

Føroyar og Grønland fara av listanum í Íslandi við størstu vandaøkjunum viðvíkjandi koronu fríggjadagin 15.mai.

Fólk, sum koma úr Føroyum ella Grønlandi, skulu tí ikki í sóttarhald, tá tey koma til Íslands.

Tað varð upplýst á tíðindafundi hjá íslendsku stjórnini í gjár.

Øll onnur, sum koma til Íslands frá 15.juni, kunnu velja millum at fara í sóttarhald, verða potað á flogvøllinum í Keflavík, ella vísa prógv, sum íslendsku heilsumyndugleikarnir hava góðkent, at tey ikki eru smittað.

Eisini skulu tey hava appina, sum sigur, hvar tey eru og hava verið, um tað vísir seg, at tey eru smittað.