Kostar fýra milliónir at kanna ferðafólk

Tað verður mett at kosta 4 milliónir krónur at kanna øll, sum ferðast til Føroya í tvær vikur.

Tann 27. juni verður latið upp fyri munandi fleiri londum í Evropa, og tað hevur við sær, at øll, sum koma til Føroya, skulu kannast.

Frá leygardegnum 27. juni til og við fríggjadagin 10. juli verður tað ókeypis at lata seg kanna, tá ið tú kemur til Føroya.

Ein meting er, at umleið 5.000 fólk koma til Føroya um vikuna.

Mæla til at játta pengarnar

Og tað fer at kosta 4 milliónir krónur, skrivar fíggjarnevndin í áliti um eykajáttanarlóg fyri juni.

Fíggjarnevndin mælir løgtinginum til at játta pengarnar.

Børn yngri enn 12 ár sleppa undan at lata seg kanna.

Eftir 10. juli skulu ferðafólk sjálvi rinda 390 krónur fyri kanningina.