Ísland: Ferðafólkatalið sum í 1961

Tey 924 ferðafólkini eru sostatt bara gott hálvt prosent av tí, sum tað plagar at vera. Sambært upplýsingum frá íslendska ferðaráðnum, koma vanliga umleið seks prosent av ferðafólkunum í apríl.

Við at rokna hesi seks prosentini, so tað svarar til samlaða talið, er neyðugt at fara 60 ár aftur í tíðina til 1961 fyri at finna færri ferðafólk í Íslandi í apríl.

Tó eru ongar upplýsingar um, hvønn mánað ferðafólkini komu til landið tá. Fram til 2002 varð bara skrásett, hvussu nógv útlendsk ferðafólk komu til landið, men ikki hvønn mánað.

Lítil vøkstur í mai

Koronufarsóttin og tilmælini hava av álvara skert ferðavinnuna. Í februar í ár komu 133.000 útlendsk ferðafólk til Íslands, og fyrru helvt í mars 64.000 ferðafólk, men í seinnu helvt í mars komu sløk 16.000.

Í apríl minkaði ferðafólkatalið í Íslandi munandi og var 924. Í mai vaks tað aftur; tá komu 1.035 ferðafólk.

Heldur henda gongdin fram, fer samanberingin við 1961 at halda fram. Tað árið komu tilsamans 13.500 útlendsk ferðafólk til Íslands.